Фыдæлты фарн – нæ иугæнæг

фарн

Æвæдза, цас диссаджы зарджытæ,     кадджытæ, таурæгътæ ис ирон адæммæ Сыгъзæрин Уастырджийы тыххæй! Суанг незамантæй, нæ рагфыдæлты — Нарты равзæрдæй абонмæ йемæ баст цымыдисаг хабæрттæ бæстон бынат ахсынц адæмон дзыхæй дзургæ сфæлдыстады. Æмæ уый, кæй зæгъын æй хъæуы, хуымæтæджы нæу. Хуымæтæджы нæй Ирыстоны зæххыл уыйбæрц рагон кувæндæттæ арæзт йæ номыл.

Лæгты Дзуары хонынц ирон адæмæй Хуыцаумæ, Хуыцауæй — ирон адæммæ дыууæрдæм минæвар, ирон адæмæн сæ сæрыл хæцæг, се ххуысгæнæг, сæ хъахъхъæнæг.

Стыр хъыгагæн, абон мах нæ фыдæлты фарны аккаг нал стæм. Тынг бирæ нæм ис аиппытæ, æгæр арæх рæдийæм. Æмæ кæд уый аххосæй нал хъуысынц нæ куывдтытæ Хуыцаумæ? Уый тыххæй нæ домы Хуыцау, цы бирæ зонындзинæдтæ нын бабар кодта, уыдон хъахъхъæнын æмæ нæ рагон кувыны æгъдæуттæ раст æххæст кæнын. Уый тыххæй нæй махæн, ирон адæмæн, кæйдæр фæзмгæйæ, æнæгъдауæй, æнæуагæй цæрын, чъизи митæ кæнын, цæсгом аппарын, æнæджелбет уæвын.

Уый тыххæй хъæуы абон, ацы карз æмæ æгъатыр дуджы бамбарын — нæ иунæг хос кæй у æрбатымбыл уæвын нæ рагон табуйаг æгъдæутты алыварс. æрмæст нæ фыдæлты фарн у абон нæ иугæнæг, рæствæндаг нын амонæг.

Уый дæр зонын хъæуы, æмæ цас фылдæр адæм иумæ кувынц, цас фылдæр адæм иу хъуыдытыл, иу зæрдæйыл хæст сты — уыйас фылдæр тых æвзæры се’хсæн. Нæртон адæм хуымæтæджы нæ кодтой стыр куывдтæ. Хуымæтæджы нæ хъæр кодтой иумæ: «Аммен, Хуыцау!» — зæрдæбын ракуывды фæстæ, хуымæтæджы нæ кафыдысты кæрæдзийы къухтыл хæцгæйæ æппæт адæмæй «Симд» — фæлæ уыдон зыдтой иумæйаг хъуыддæгты нысан æмæ мидис — уы­дон стыр фадæттæ дæттæг кæй сты, уымæн æмæ уæд уæларвон сыгъдæг тыхтимæ, энергитимæ дыууæрдæм бастдзинад æххæст цæуы.

Уымæ гæсгæ нæ хъæуы абон нæ куырыхон, бирæ зонаг фыдæлты бафæзмын æмæ æппæт адæмæй иумæ раст æмæ сыгъдæгзæрдæйæ табу кæнын, кувын Хуыцау æмæ Лæгты Дзуармæ, хатыртæ сæ курын нæ бирæ рæдыдты тыххæй.

Уæлдай хуыздæр фадат дæтты уымæн Уастырджийы кувæн къуы­ри. Уый у æгас Ирыстоны иумæйаг бæрæгбон æмæ уæлдай тынгдæр æмæ зæрдиагдæрæй бацархайын хъæуы уыцы бонты, цæмæй нæ куывд Хуыцаумæ фехъуыса, æмæ нæ рæствæндагыл бафтауа.

Уый тыххæй хъæуы бæрæгбоны æгъдæуттæ, нæ хистæр фæлтæртæ сæ куыд æххæст кодтой, афтæмæй кæнын.

Алы хæдзары дæр сæ æфсинтæн сæхи къухæй скæнын сыгъдæг, табуй­аг хъуыдытимæ æртыгай кæрдзынтæ æмæ æртæдзыхæттæ.

Кусарт чи кæна, уый æппæт лыстæг хабары онг хъуамæ ирон æгъдау сæххæст кæна (æнæмæнг зо­нын хъæуы — кæй не мбæлы нæдæр чъиритæй, нæдæр кусарты дзидзайæ æмæ хуылфыдзауматæй никæмæн ацаходын, цалынмæ сæ фынджы уæлхъус хистæр скува, уæдмæ).

Бæрæгбоны кувинæгты сæрты Хуыцаумæ табу кæнын, кувын хъæуы æрмæст бæгæны кæнæ къуымæлæй.

Абоны онг ирон адæм тынг зæрдиагæй фæбæрæг кæнынц Уастырджимæ кувыны бонтæ. Джеоргуыбайы бæрæгбон у ирон адæмы кадджындæр æмæ дзадджындæр бæрæгбттæй иу.

ТУАТА  Алина

№3 (3) ноябрь, 2014 г.

Join the discussion

Ваш e-mail не будет опубликован. Обязательные поля помечены *